میرپورخاص: محمودآباد کے علاقے میں پولیس مقابلے میں بدنام زمانہ ڈاکو چھوٹو ناریجو 4 ساتھیوں سمیت ہلاک جب کہ 2 ایس ایچ اوز سمیت 4 پولیس اہلکار جاں بحق اور ایک ایس ایچ او سمیت 4 اہلکار زخمی بھی ہوئے۔
ایس ایس پی حیدرآباد عرفان علی بہادرنے ایکسپریس نیوز کو بتایا کہ جمعہ اور ہفتہ کی درمیانی شب میر پور خاص کے علاقے محمود آباد میں ڈاکوؤں کی موجودگی کی مصدقہ اطلاع پر حیدرآباد اور مقامی پولیس کے 2 درجن سے زائد تھانوں کی نفری نے مشترکہ آپریشن شروع کیا جو صبح تک جاری رہا۔ مقابلے میں بدنام زمانہ ڈاکو چھوٹو ناریجو 4 ساتھیوں سمیت ہلاک ہو گیا جب کہ ڈاکوؤں کی فائرنگ سے حیدر آباد کے 2 ایس ایچ او وائس بخش لغاری اور حسن عابدی سمیت 4 پولیس اہلکار بھی جاں بحق اور ایک ایس ایچ او ممتاز بروہی اور 3 پولیس اہلکار احسان علی، حسنین علی اور وارث بھٹو زخمی بھی ہوئے۔ مقابلے میں زخمی ہونے والے پولیس اہلکاروں کو فوری طور پر سول اسپتال حیدر آباد منتقل کیا گیا جہاں ڈاکٹرز کے مطابق ایس ایچ او ممتاز بروہی کی حالت تشویشناک ہے جب کہ دیگر اہلکاروں کی حالت خطرے سے باہر ہے۔
پولیس حکام کا کہنا ہے کہ ڈاکو پورے سندھ میں اغوا برائے تاوان، قتل، اقدام قتل سمیت سنگین جرائم کی وارداتوں میں ملوث تھے جب کہ ڈاکوؤں کے ساتھیوں کی گرفتاری کے لئے سرچ آپریشن شروع کر دیا گیا
